決定要狠｜薛可正
朋友問我，呢一世人有冇做過錯嘅決定，我瞪一瞪眼反問佢一句：「吓，我一直都保持住做錯決定架喎。」
朋友望住我，一臉不可思議：「你都會做錯決定？」
「點解唔會？」
老實講丫，其實我都幾勇於同幾嚮往做錯決定，因為所有嘅決定背後最重要嘅，係改變。
人生要過幾十年，由出世讀書、拍拖、搵工、換女/男朋友、換工、買樓、結婚、換樓、離婚、賣樓、再婚、退休……
未計你每日食飯買衫，睇邊場戲，我哋一生人入面要做嘅決定多到銀河沙數一樣，每一個決定唔係啱，就只有錯，如果係咁嘅話，仲咁執著嚟做咩？
你係一個好謹慎嘅人，你覺得自己唔可以做錯決定，只要做錯一個決定，你就會覺得自己人生幾乎毀咗，但好多你又會遇到下一個決定，當你再思考眼前呢個決定要點決定時，你已經唔記得咗自己上一個錯嘅決定。
但你已經墮入咗「唔錯得」呢個無間地獄。
好多人都覺得決定唔錯得，覺得人生唔錯得，朝頭早襯錯衫出街又覺得世界末日，最後全日黑面，一路唔放過自己一路質問自己點解會做錯，最後嗰日去邊玩都唔開心，若干年後，你襯錯一日衫呢啲小事真係「邊X個會理」，但你失去咗可以開心嘅一日，呢啲快樂指數點滴會影響你每一日嘅喜樂。
「快樂指數」聽落好似好專業，但其實講簡單啲就係你每日嘅折磨自己嘅指標，一日一百個決定，我俾你做錯八十個，嗰一日太陽都係會落山，你夜晚依然要瞓覺，最重要聽朝個太陽都係會再出嚟。
我性格唔中意做決定，因為金牛座最怕改變，中意嘅嘢可以食一世，中意嘅人都可以對一世。但如果有一日我發覺事情有變，要自己視野已經可以知道需要改變，我會好快做決定。
好用最快時間做一個決定，如果錯咗，我仲有時間修正。
呢個道理同趁後生創業一樣，你愈早創業就愈早仆街，你仆街嗰一刻正正就你你創業嘅原因。用最快嘅速度作出改變，拎住失敗過嘅經歷，第二次出現嘅成功，先係人生入面嘅成功，係經歷過高高低低，令你知道乜嘢叫不卑不亢嘅成功。
所以以為做咩決定都要狠，決定夠快，錯咗都唔係好覺眼。
____________________________________________________________
薛可正TBC文章收費平台《榕樹頭唔斷氣》現已推出
每周定時更新文章，
九月推出全新連載故事，
文字有價，多多支持。
訂閱傳送門：https://pr7d8.app.goo.gl/GSAM
文章列表：
1.「我的成長地」〈免費〉
2.「置樂」 〈收費〉
3.「1991年9月1」 〈收費〉
4.「隆重冷氣儀式」〈收費〉
5.「三聖神石」 〈收費〉
6.「發發」 〈免費〉
7.「跳繩、幫捉、何濟公」〈收費〉
8.「任天堂」〈收費〉
查詢網址：tbcstory.com
*******************************************************
IG：sithoching
Page：薛可正
Search